خليك ستريتش !!

مفيش حاجة بقت توجع الراس والقلب والمعدة أكتر من التعصب، التعصب بكل أنواعه وأشكاله وألوانه..
يا واحد متعصب لرأيه لدرجة إنه يشتم ويلعن صاحب الرأي الآخر، يا زوج متعصب إن كلامه هو اللي يمشي، يا زوجة مُتعصبة بأنها ملاك نازل من السما بيرفرف بجناحين وطول النهار في بيتها بتملاه خير وود ورخاء.. وأمثلة تانية كتير بنشوفها كل يوم في حياتنا من أشكال عجيبة وجديدة للتعصب..

جرا إيه يا عم أنت وهي ما تهدوا وتاخدوا نفس كده وتطلعوا من الموقف وبصوا من بعيد!!
اخدتوا نفس؟! عميق كده ملى صدركوا!!
طيب تعالوا نجري بعيد..

شايف الحوار اللي هناك ده؟.. شايف رأيك اللي ماسك فيه وصوتك اتنبح وانت بتقنع اللي قدامك بيه؟ أيوة هو اللي قارفك ده بقاله فترة.. تعالى نبصله كده بس برضو بص على اللي جانبه.. رأي غيرك..

قال الشافعي – رحمه الله –
“رأيي صواب يحتمل الخطأ.. ورأي غيري خطأ يحتمل الصواب!”
شوفت.. عرفت.. يمكن رأي غيرك يطلع صح، وأكيد كلامك أنت كمان صح..

طب والله أنا اللي رأيي صح وهو اللي غلط وهو مش فاهم ومش شايف ومش حاسس.. تمام .. أنا معاك..

بس يا ترى راجعت نفسك الأول؟! شوفت الموضوع بعين اللي قدامك ولا اللي بعينك بس؟ طيب فكرت قبل التعصب الشديد ده وتمسكك برأيك ولا لأ؟!

عارف إن الفريق التاني ده عظيم برضو زي فريقك وليه بطولات وكاسات بالهبل وكان نجم النجوم في يوم من الأيام، بالراحة يا اسطى على صاحبك بلاش تشدوا كده علشان فريق كورة ده انتو متربيين سوا..
طب مراتك المُزة الحلوة دي ما هي كمان شايلة بلاوي ومعبية كفاية إنك بقالك اسبوعين مبترميش كيس الزبالة وهي ساكتة وبقالك شهر ونص مخرجتهاش ومن سنتين مزودتش مصروفها ومع كل ده لسه بتحبك!..
وأنتي مش بعيد تكوني غلطانة مع جوزك بس انتي مش واخدة بالك، بتنامي وريحة البصل معبية هدومك وبتفضلي تشخري طول الليل والراجل مش عارف ينام ومبقتيش تقوليله يا بيبي زي زمان وبقاله سنتين مبتحضريلوش ولو ساندوتش للفطار زي أول ايام الجواز ومع كل ده ولسه بيحبك!..
وبابا وماما مش موافقينك علشان ليهم وجهة نظر تانية غيرك بعد خبرة سنين طلعت عينهم وخايفين ومرعوبين عليك وهمّ أول ناس قلبهم هيتوجع وهيشيلوا شيلتك لو حصلك حاجة بسبب اللي انت متمسك بيه ومصمم عليه!! ومع كل بلاويك لسه بيحبوك وأنت اغلى ما عندهم..

طيب يعني عايزاني أعمل إيه؟ ما أنا فهمت اللي قدامي مليون مرة إنه غلط وأنا صح وأنا عارف وعامل أبحاث في ناسا إن كلامي صح ومعايا جايزة نوبل على كلامي..

يا عم عارفة والله بس ممكن بالراحة، ممكن تبقى ستريتش!!

آه خليك ستريتش، بلاش تتعصب وتوجع القولون علشان صحتك.. يا سيدي أنت شايف إنك صح، وهمّ غلط، دخلت اخدت لفة جوا دماغهم لما دروخت وتعبت وشوفت ألوان قوس قزح وبرضو مقتنعتش ولا اقنعت اللي قدامك..
تمام.. خليك بقى استريتش.. أقبل اللي قدامك بس متغيرش رأيك.. شوفت الموضوع بسيط ازاي؟!

حقيقي الموضوع بيوجع إن بسبب التعصب بنخسر اصحاب، بنخسر شغل، بنخسر أهلنا وساعات نفسنا علشان مجرد آراء وتعصب ملهوش أي لازمة.. أمور تافهة مش مصيرية وملهاش أي تلاتين لازمة بنلاقيها بتبوظ علينا حياتنا وبتخسرنا كتير..
أسباب طلاق تافهة بتهد بيوت مع إن بالتفاهم ومراجعة النفس ممكن نوصل لحل وسط وصوتنا يوطى وترجع الضحكة تنور وشنا من تاني..

طول ما رأي اللي قدامك مش هيسببلك أذى، مش هيجرحك ولا يوجع كرامتك، مش هيوقف الدنيا والدنيا هتمشي بعده، لازم تكون ستريتش!!

قراراتك المصيرية حاجة، والأمور اللي بنقضي فيها يومنا حاجة تانية، عارف كده زي بنتين صغيرين في اولى ثانوي بيتخانقوا فستان منة شلبي أحلى ولا فستان رانيا يوسف أحلى واتخانقوا وشّدوا جامد مع بعض.. ولا واحدة فيهم اصلا في الآخر هتلبس فساتينهم لأن الاتنين معاهومش دعوة للمهرجان!!

طول ما الموضوع مش هيغير الكون برأيك ولا في حياتك عديها وطريها وخليك استريتش.. اقبل الطرف التاني من غير صداع ولا وجع قولون ولا كرشة نفس!!

جرب تقول في وسط مناقشة فيها اختلاف آراء رأيك ده هايل جدًا ومقنع بصراحة بس أنا شايف عكسك.. استحالة هتشد مع اللي قدامك ولا هتتعبه ولا هتتعب نفسك!!

خليك استريتش هتلاقي الدنيا ابسط وأسهل من كل الدوشة دي.. والأمراض هتروح.. وهتنام مرتاح وبالك فاضي من هري كتير..
صاحبك ده عشرة العمر اللي بسببه عرفت يعني إيه صحوبية ومتقدرش تستغنى عنه..
ومراتك دي احلى حاجة في حياتك أصلًا وانت من غيرها ولا تسوى..
وجوزك ده قمر وانتي من غيره هتبقي ولا حاجة..
وبابا وماما ربنا ميحرمكش منهم ويفضل حسهم في الدنيا ويخليك ليهم ويخليهم ليك..
طول ما أنت استريتش الحياة هتتبسطلك أكتر بكتير ما كنت أنت فاكر.. واهو تبقى محاولة مننا إننا نخلي اليوم يمد دراعاته ويقولك تعالى بالحضن يا حبيبي.. بس متنساش تبدأ بنفسك الأول..