شاورت للتاكسى و ركبتبصيت للسواق اتفاجئت من كبر سنه و من وشه الى مافيهوش مكان سليم من كتر التجاعيد الى مغطية على شكله و متبت فى الطارة و ايديه فيها رعشه خفيفة.
مش عارف لية اول لما ركبت جنبه حسيت ان هما دول الناس الى بتقول الدنيا لسه بخير
انا : حضرتك بتسوق بقالك كتير ؟
السائق : انا بسوق التاكسى من سنة 1948
(يعنى بيسوق من قبل ما جدى يتجوز اصلا )
انا : و ياترى اية خلاصة خبرتك فى السواقة الى ممكن تقولها لواحد زيى عشان اتعلم منها
السائق : نملة سودة على صخرة سودة فى ليلة حالكة الظلمة يرزقها الله
انا : قصدك اية ؟!!
السائق : هحكيلك حكاية حصلت معايا الشهر ده علشان تفهم قصدى
انا : ياريت
السائق : انا فضلت عيان 10 ايام و مبشتغلش و مكونتش قادر اتحرك من السرير و انا طبعا على باب الله و اليوم بيومه ..و بعد اسبوع ماكنش فيه فى البيت ولا مليم .. انا عارف و مراتى مخبيه عليا .. اقولها هنعمل اية يا سيتى تقولى الخير كتير يا حاج .. و هى عمالة تشحت اكل من الجيران و انا طبعا ولادى الى فيهم مكفيهم و كل واحد فى وادى و عنده مشاكله .. بعد 10 ايام قولت للحاجة هنزل الشغل حلفت مانا نازل الشغل عشان هموت منها .. فكدبت عليها و قولتها هروح القهوة ساعة و ارجع عشان اتخنقت و عاوز اشم هوا
و دورت العربية و قلت ياربنا يا رزاق
فضلت ماشى لحد ملاقيت عربية 504 عطلانة و السواق بتاعها بيقولى معايا واحد عربى طالع المطار تاخده عشان عربيتى عطلت ؟ واخد بالك من حكمة ربنا ؟ معاه 504 حالتها بريمو و عطلت , قلت له اوصله
ركب معايا الزبون طلع من عمان سألنى هتاخد كام قولتله الى تجيبه و أكد عليا قولتله الى تجيبه هاخده
عرفت انه رايح مطار برج العرب عشان هيخلص حاجة هناك .. فقولتله انا حفيدى بيشتغل هناك و ممكن يساعدك .. و بالفعل لاقيت حفيدى هناك فى الوردية .. طبعا كان ممكن ملاقهوش .. خلصنا الحاجة الى عاوزها و رجعنا سموحة
سألنى عاوز كام يا حاج ؟ قولته احنا اتفقنا الى تجيبه فراح مدينى 50 جنية اخدتهم و همشى .. قالى راضى قولته اه راضى الحمد لله
قالى بص يا حاج الجمرك كان المفروض 1400 جنية و حفيدك خلانى ادفع 600 جنية يعنى فيه فرق 800 جنية دول طالعين من ذمتى ليك يعنى حلالك و دول 200 جنية اجرة المشوار يبقى الف جنيه و ال 50 جنية الى معاك هدية منى ليك :))
شفت يا استاذ يعنى مشوار واحد جابلى الف جنيه ممكن اشتغل شهر و ماجبهومش .. شوفت ربنا نزلنى من بيتى وعطل التاكسى 504 و اوجد لى كل المسببات علشان يرزقنى الرزق ده .. اصل كل ده بتاع ربنا .. دى الحاجة الوحيدة الى اتعلمتها فى حياتى.
و نزلت من التاكسى بعد ما وصلت و كان نفسى اقعد اسمع منه اكتر بس انا كمان كان عندى موعد مع الجرى المستمر وراء الرزق
” أولم يروا أنَّ اللَّه يبسط الرزق لمن يشاء ويقدر ” ؟؟
اسعي انت بس وعافر وادعيله وهو هيرزقك .. متقولش بس ازاي !!
هو سبحانه إذا أراد شيئا هيأ له الأسباب .. فمتشلش هم الاسباب
إعقلها وتوكل علي مسبب الأسباب☝️ بقلم..بسيوني عبدالله
