ليه يا زمان بحن لزمان
كبرت انت ولا أنا يا زمان
مكاني لسة هواه المكان
كل ركن فيه بيقول كان ياما كان
عن حبايب راحوا و سابوه يا زمان
كبرت انت ولا أنا يا زمان
كنا نصحي من الفجرية مع صوت الآذان
و صوت الوابور عليه الميه بتغلي جوا القزان
و صوت قوي حنين ينادي
قوم اصحي انت و هو يا كسلان
و صوت طيب يقولك قوم إلحق اللبان
و فطار كله بركة أشكال و ألوان
و ساعة و يوم يعدوا بالتيلة و الحسبان
كبرت انت ولا أنا يا زمان
القلب طيب و النفس راضية
و ماحدش بيبات جعان
لو قلت آه ألف من يقول إلحقوا يا جدعان
دا فلان يا ولداه تعبان
و لو قلت يا فَرْح تتفرش الأرض ورد و ريحان
و فلانة تنادي بالصوت الحيان
افرحوا يا حبايب دي خطوبة بنت الجيران
ما القلب طيب و النفس راضية
و ماحدش حسدان
كبرت انت ولا أنا يا زمان
و من بدري تلاقي عم محمد و عم سمعان
و معاهم الواد بلية و الواد مينا بيفتحوا الببان
رش يا ابني ميه قدام الدكان
هلّي يا صبية هلّوا يا أفندية دي ساعة صبحية
و الكل فيها رابح و كسبان
ما هو الرزق مش بإيدي ولا بإيد فلان
دا كله بإيد الكريم الرحمن
ما القلب طيب و النفس راضية
و ماحدش حسدان
كبرت انت ولا أنا يا زمان
القلب اتوجع و باين في عينيك يا زمان
شكلك حنيت معايا لزمان يا زمان
كفاية كدا مش هأحكي كمان
دي حكايتنا تتغني علي الناي و الكمان
و قبل ما نفترق يا زمان
أزيدك من البيت أشجان
كبرت أنا مش انت يا زمان
————————-
