الخوف مشاعر طبيعية وأول مشاعر الانسان بيحس بيها من يوم ولادته وبتفضل موجودة وعايشة معانا لو اختفت بيكون في خلل عقلي ولو زادت اوي بيكون في اضطرابات زي القلق العام والفوبيا والهلع وغيره
هنتكلم عن اول جزء وهو اضطرابات مشاعر الخوف ايه سببها هنقول شوية منهم
_ اول حاجة بسبب التوتر اللي بنتعرض ليه علشان ننفذ الاوامر بشكل مظبوط يعني المثالية في التفكير والمعاملة والحاجة تخلص بالظبط والملي وفي الوقت نفسه بتسبب خوف من الغلط وقلق عام من الفشل لازم ندي لنفسنا مساحة ونهون شوية على نفسنا من غير اختراق قوانين يعني 😉
– التعرض للأخبار المخيفة والمفزعة والتغلغل في تفاصيلها بتخلينا مهيأين لارتفاع الخوف جدا وبيتفرز هرمون اسمه الادرنالين بيخلينا متحفزين وده السبب الاكبر فيه السوشيال ميديا للأسف
– الخوف من المجهول والتفكير فيه المجهول اللي هو اصلا محدش يعرفه ولا يعرف ايه اللي هيحصل في حياتنا
– الخوف من العقاب علشان وصلنا افكار مغلوطة عن العقاب واننا مهددين مع ان ربنا رحيم بينا جدا جدا ودايما بيهون علينا القدر وفاتحلنا باب للطمأنينة وتغيير القضاء وهو الدعاء
– خليها قاعدة عندك اي موضوع هتركز فيه اوي هتخاف منه المرض الموت الخطف الانفصال هتبقى عنك فوبيا ورعب وخوف وهو مش مفهوم بالنسبالك فعقلك وخيالك هيشتغل ويزود الافكار .
