الغضب مشاعر سلبية وسريعة ومتصاعدة وكتير بيتبعها الندم لو مكنتش محسوبة لان ف الغضب بتطلع مشاعر غلط وساعات تصرفات غلط فبالتالي ممكن اوي نندم.
طيب اعمل ايه لما احس اني هغضب ؟
ركز معايا
لما يكون موقف ينفع التغافل عنه يبقى الاولى انى اتغافل علشان كتر التعرض لنوبات الغضب يوميا بيكون مولد للاضطرابات النفسية وتكدير للمزاج وحالة زهق ممكن اتجنبها وانت بتتعرض لحوالى 80 ضغط يومي فلو ركزت معاهم يبقى يومك هيخلص في الغضب والعصبية
لو موقف محتاج اغضب يبقى لازم التعبير يكون مناسب للموقف واغضب بس ف حدود الموقف يعني مش نفس التعبير عن حد ضربني بالقلم زي اللي داس على رجلي بالغلط 👎
متسيبش نفسك للاسترسال ف الافكار اللى تخليك تغضب وتفضل تفتكر القديم والجديد للشخص ده كده هتوصل لقمة الغضب احاول احط نفسي مكان اللي قصادي بتفكيره والتمسله اي عذر زي مثلا ده طفل مش فاهم او ده نفسيته تعبانة ومتعرض لضغوط او دي على أد طريقة فهمها علشان اهدى حتى لو مؤقتا
ابعد عن المكان اللي فيه الاستثارة ولو واقف اقعد او اروح مكان تاني واحاول افصل تفكيري باي حاجة تانية تشغلني وليكن الاستغفار وتمارين التنفس
افكر نفسي ان تعرضي لنوبات غضب هيأثر عليا ويدخلني في اضطرابات كتير وانا ممكن اتجنبها المهم اكون كويس واحافظ على نفسيتي
واخيرا كلنا لينا هفوات واخطاء لو عاوز الدنيا تمشي بشكل مثالي فانا بفكر غلط لو هدقق على كل تفصيلة صغيرة هتعب لو مش هعذر هكره ودي اسوء حاجة هعملها ف نفسي
لازم تفريغ طاقتي دايما والناس اللي بتغضب كتير تعمل مجهود بدني عالى
حافظ على طاقتك احنا محتاجينها في حاجات ايجابية تفيدك❤️❤️
