الفنالمرأة والطفل

لعبة نيوتن واكتئاب ما بعد الولادة

بقلم دكتورة مي محمد

مسلسل أثار قضية مهمه جدا وحالة كتير من الستات بتتعرضلها بعد الولادة والاهتمام بيها بيكون قليل جدا للأسف مع انها ساعات بتكون مهددة لحياة الأم او الطفل ..

ايه هو اكتئاب مابعد الولادة؟؟ وايه انواعه؟
هو حالة من الحزن والكدر واحيانا العصبية والبكاء بتصيب الأم اللى لسه والدة او في بعض الاحيان بتبدأ من قبل الولادة وغالبا بتستمر من اسبوعين لتلات اسابيع وفيها بتتراجع هرمونات الحمل بسرعة وده بيدخل الام في الحالة دي. بتكون الام وخصوصا مع الطفل الاول عندها لغبطة مشاعر واحساس بالمسئولية تجاه الطفل الصغير جدا ده ويمكن حتى مش عارف تأكله او تغيرله .. ده بالاضافة لقلة النوم والألم وتغيير شكل جسمها وعدم قدرتها على الاهتمام بنفسها لكن مع الوقت بتبدأ تتعود او ممكن تلجأ وتطلب مساعدة اللي حواليها او حتى مساعدة متخصص نفسي لاعادة تنظيم شكل الحياة تاني وبتعدي او بتستمر حالة الحزن او العصبية الزايدة دي وقلت النوم لحد ما تتعالج بمضادات الاكتئاب اللي في منها مناسب للرضاعة الطبيعية وبيكون ده الاختيار الافضل مع العلاج النفسي بالكلام…

النوع الخطير من اكتئاب بعد الولادة هو اللي بيكون للاعراض اللي اتكلمنا عنها دي مصاحب اعراض ذهان يعني هلاوس او افكار ضلالية زى انها تقتل نفسها او تقتل ابنها او حد بيحاول يأذيها او يتجسس عليها والحالة دي خطيرة ومهم جدا التحرك يكون سريع بمجرد ظهورها لان الام هنا بيتاخد منها الطفل وممكن تدخل مستشفى لحد ما تتعافى وتهديدها بالانتحار للأسف بيكون حقيقي او انها تأذي ابنها…

للأسف ثقافة التعامل مع الحالات دي بتبدأ بانها بتدلع يعني محدش خلف غيرها ولا ايه !!! او محسودة وعليها عفاريت ونلف على المشايخ نشوف حل !!! ومع العطلة دي الحالة بتتدهور وبتكون أشد خطورة ..
المسلسل وضح تصرف الدكاترة والتمريض الواعي مع الحالات دي وازاي حرصهم على مصلحة الام والطفل انها متاخدوش ويتسلم للأب او لحد اسرتها ودي نقطة مهمة جدا جدا .
الحالة دي من الحالات المهم نتعامل معاها بحكمة عالية جدا ووعي نفسي لانها زى ما ذكرنا في نوع منها خطير والاهل بيتفاجئوا من الاعراض دى وبيكون عندهم حالة من حالات الإنكار اللي بتأخر العلاج.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق